Janë dënuar me gjobë në vlerë prej 700 eurosh tre kërcënuesit e gazetarit, Vehbi Kajtazi. 

Gjykata Themelore në Prishtinë u ka shqiptuar gjobë Brahim Hajvazit, Kadri Racit dhe Afrim Gashit, të cilët në dhjetor të vitit 2021 përmes rrjeteve sociale kishin kanosur Kajtazin. 

Aktgjykimi ndaj të akuzuarve u shpall të hënën, pasi të akuzuarit e kishin pranuar fajësinë në seancën fillestare, raporton “Betimi për Drejtësi”. 

Sipas këtij aktgjykimi, secili veç e veç është i obliguar të paguajë dënimin me gjobë në vlerë prej 700 euro brenda afatit të caktuar ligjor. 

Gjykatësja njoftoi se në rast se dënimi me gjobë nuk realizohet, i njëjti do të zëvendësohet me burgim./Gazeta10