Gjykata Themelore në Prishtinë ka shpallur sot vendimin për rastin e vrasjes së Liridona Ademajt, duke dënuar me burgim të përjetshëm Naim Murselin dhe Granit Plavën, ndërsa Kushtrim Kokallën me 30 vjet burgim. 

Pas shpalljes së vendimit, vëllai i së ndjerës, Leonard Ademaj në emisionin “Gazeta” në Kanal10, tha se kjo nuk ishte një ditë e lehtë për familjen.

“Sot nuk ishte një ditë e lehtë. U vërtetua se Naimi, së bashku me Kushtrimin, e ka organizuar këtë vrasje, duke e zgjedhur Granitin si vrasës. Vendimi i sotëm na lehtëson sadopak dhimbjen dhe jep një mesazh të qartë për të gjithë ata që pretendojnë të bëjnë një krim të tillë, sepse kriminelët duhet të dënohen ashtu siç e meritojnë”, ka deklaruar ai.