Qendra Kosovare për Rehabilitimin e të Mbijetuarve të Torturës( KRCT), ka ftuar institucionet e vendit që që të vazhdojnë ndjekjen e drejtësisë për viktimat e dhunës seksuale gjatë luftës, raporton Gazeta10.

Ky reagim erdhi pasi sot Gjykata themelore në Prishtinë ka shpallur Zoran Vukotiqin përgjegjës për kryerjen e krimeve të dhunës seksuale gjatë luftës në Kosovë.

Nga KRCT kanë thënë se ky vendim tregon që krimet e dhunës seksuale as nuk falen e as nuk harrohen.

Reagimi i plotë:

Sot më 11 nëntor 2022, Gjykata Themelore në Prishtinë gjatë shqyrtimit të rigjyqësoritë përsëri shpalli Zoran Vukotiq-in përgjegjës për kryerjen e krimit të dhunës seksuale gjatë luftës në Kosovë dhe e dënoi me 10 vjet burgim.

Pas vendimit për dënim me 10 vite burgim për krimin e dhunës seksuale gjatë luftës të marrë më 5 korrik 2021 nga Gjykata Themelore e Prishtinës kundër Zoran Vukotiq, për shkak të parashtrimit të ankesës në Gjykatën e Apelit, rasti ishte kthyer në gjykim të sërishëm dhe sot Gjykata Themelore në Prishtinë – Departamenti Special, shpalli Aktgjykimin dënues me të cilin Zoran Vukotiq shpallet fajtor për krimin e dhunës seksuale gjatë luftës kundër viktimës shqiptare.

Vendimi i marrë në vitin 2021 ishte një pikë kthese për të mbijetuarit e dhunës seksuale në Kosovë, duke ua rikthyer besimin në institucionet e drejtësisë dhe shpresën për dënimin e personave përgjegjës për krimet e dhunës seksuale gjatë luftës.

Kurse konfirmimi i sotëm i të njëjtit vendim e fuqizon edhe më tutje këtë besim që po ndërtohet përmes guximit të të mbijetuarve që kanë paraqitur rastet e tyre në prokurori dhe përkushtimit të institucioneve të drejtësisë për t’i shkuar deri në fund procesit të vënies së drejtësisë në vend.

Ky vendim përçon mesazhin që krimet e dhunës seksuale as harrohen e as falen, por pavarësisht kohës që ka kaluar dhe përpjekjeve për t’i ikur drejtësisë, ajo herët ose vonë do të arrihet dhe do të jetë e palëkundshme.

Rruga e drejtësisë e cila është hapur me këtë vendim është në vazhdimësi, do të jetë e pandalshme dhe të gjithë presim që drejtësia të arrihet edhe për rastet e tjera në proces duke i dhënë fund pandëshkueshërisë që ka mbizotëruar deri tash.

Andaj, ftojmë institucionet relevante që të vazhdojnë ndjekjen e drejtësisë me të njëjtin përkushtim dhe profesionalizëm në mënyrë që drejtësia të vihet në vend për të mbijetuarit e dhunës seksuale gjatë luftës në Kosovë./Gazeta10