Edhe kësa radhe si herave të tjera, “Darka e Lamës” ka mbledhur një numër të madh të mërgimtarëve dhe përfaqësuesve të shtetit në Gjermani.

Ilir Seferi nga “Besa Foundation” ka bërë të ditur se “Darka e Lamës” është organizuar nga ta në bashkëpunim me Parlamentin e Kosovës.

“Sot po e organizojmë për herë të katërt Darkën e Lamës për ndërmarrësit dhe miqtë tanë këtu”, ka thënë Seferi.

Seferi në një intervistë ekskluzive me Kushtrim Sadikun, ka rrëfyer legjendën e hotelit ku është mbajtur “Darka e Lamës”.

“Ky hotel daton prej vitit 1489. Legjenda thotë se nëse këtu flen atëherë të shtohet dyfishi i punës dhe bereqetit në të ardhmen”, ka rrëfyer Seferi.

Në mesin e të pranishmëve, kryeparlamnetari Glauk Konjufca është shprehur i lumtur që tashmë kjo darkë po bëhet tradicionale.

“Më vjen mirë që po bëhet tradicionale dhe fondacioni Besa po e organizon për të disatën vit me radhë”, ka thënë Konjufca.

Ndryshe, “Darka e lamës” është kryefestë pagane e motmotit, që shënon mbarimin e verës e fillimin e dimrit, kur mblidhen të lashtat, frutat e bereqeti.

Është festë tradicionale shqiptare, e cila zakonisht është mbajtur në fund të tetorit kur janë vjelë të mirat e punës verore.