Kryetari i Kuvendit të Kosovës, Glauk Konjufca, ka pritur në takim presidentin e Maltës, George Vella, raporton Gazeta10.

Konjufca ndër të tjera i ka kërkuar mbështetje për liberalizimin e vizave presidentit të Maltës.

Në njoftimin nga Kuvendi i Kosovës, thuhet se janë diskutuar edhe raportet dypalëshe.

Më tej, ata kanë diskutuar edhe për intensifikimin e raporteve mes dy shteteve.

Përpos me Konjufcën, Vella është takuar sot edhe me presidenten e Kosovës, Vjosa Osmanin.

Këtu keni komunikatën e plotë:

“Kryetari Glauk Konjufca priti në takim Presidentin e Maltës, George Vella

Kryetari i Kuvendit të Republikës së Kosovës, Glauk Konjufca, ka pritur sot në takim Presidentin e Republikës së Maltës, George Vella, i cili po qëndron për vizitë zyrtare në shtetin tonë me ftesë të Presidentes Vjosa Osmani.

Në takim, përveç çështjeve tjera, u bisedua për raportet dypalëshe dhe proceset aktuale nëpër të cilat po kalon Kosova, si dhe u shkëmbyen mendime për zhvillimet politike dhe sfidat e sigurisë në rajon e më gjerë.

Kryetari Konjufca vlerësoi se marrëdhëniet ndërmjet dy shteteve tona janë shumë të mira dhe shprehu gatishmërinë për avancimin e mëtejmë të bashkëpunimit në çdo fushë me interes të ndërsjellë.

Malta, tha Kryetari Konjufca, është ndër shtetet e para që e ka njohur pavarësinë e Republikës së Kosovës dhe ne jemi përherë mirënjohës për njohjen, por edhe për përkrahjen e palëkundur drejt të ardhmes në BE dhe anëtarësimin në organizatat e ndryshme ndërkombëtare.

Duke kërkuar nga shteti mik i Maltës vazhdimin e mbështetjes për agjendën evropiane të Kosovës, përfshirë edhe liberalizimin e vizave, Kryetari Konjufca nënvizoi se qytetarët tanë janë të vetmit në Evropë të cilët ende nuk mund ta gëzojnë të drejtën e lëvizjes së lirë.

Pasi e falënderoi Kryetarin Konjufca për mikpritjen, Presidenti George Vella shprehu gatishmërinë për intensifikimin e bashkëpunimit dhe fuqizimin e partneritetit dypalësh, si dhe ritheksoi përkushtimin për të qëndruar përkrah Republikës së Kosovës në rrugën e saj të integrimit evropian”, thuhet në komunikatë e plotë. / Gazeta10