Shumë amerikanë mund të mos e ndiejnë “epokën e artë” ekonomike të Donald Trump – por llogaria bankare e presidentit po.

Ai fitoi miliarda dollarë vitin e kaluar nga zotërimet në kriptovaluta, pagesa të të drejtave (royalties) dhe investime në pasuri të paluajtshme, si dhe fitime të konsiderueshme nga shitja e Biblave, orëve dhe atleteve me markën Trump, sipas deklarimit të tij të fundit financiar vjetor, të publikuar të martën, raporton CNN.

Kjo ishte një kujtesë e re se kjo është një presidencë si asnjë tjetër më parë. Larg nga distancimi i plotë dhe i dukshëm nga marrëveshjet e tij personale financiare gjatë kohës në detyrë, siç kanë bërë të gjithë paraardhësit e tij modernë, Trump ka krijuar marrëveshje të reja – për shembull, duke emetuar vetë tokenë të kriptomonedhave.

Megjithëse presidentët dhe zëvendëspresidentët në përgjithësi nuk mbulohen nga ligjet ekzistuese të etikës, ata zakonisht i kanë menaxhuar çështjet e tyre sikur të ishin të mbuluar prej tyre, jo më pak për t’i shmangur pasojat politike të mosveprimit në këtë mënyrë.

Por që kur Trump theu traditën duke refuzuar t’i publikojë deklaratat e tij tatimore gjatë fushatës presidenciale të vitit 2016, ai ka prirje t’i injorojë konventat rreth pasurisë dhe biznesit të tij – dhe duket se kryesisht ka shmangur dëme politike të qëndrueshme.

Detajet e pasurisë në rritje të Trump u përfshinë në publikimin e deklarimeve të tij financiare të detyrueshme. Nuk ka asnjë provë apo sugjerim për sjellje kriminale apo veprime kundër presidentit.

Por mund të ketë përgjegjësi politike.

Një pyetje tani është nëse lajmet e fundit për pasurinë e Trumpit, dhe shqetësimet në rritje mes kritikëve për konfliktet e mundshme të interesit, do të kenë ndikim te publiku në një kohë kur shumica e amerikanëve nuk po ecin aq mirë sa presidenti i tyre.

Ishte ose një shenjë shkëputjeje nga realiteti ose një guxim i pastër politik që e shtyu atë ta adresojë këtë mospërputhje të mërkurën, përpara se të hipte në Air Force One të ri luksoz – një dhuratë nga Katari me vlerë të vlerësuar prej 400 milionë dollarësh.

“Ne të gjithë po përfitojmë. Unë po përfitoj sepse kam shumë para dhe shumë cash”, tha ai.