Udhëheqësi Suprem i Iranit, Mojtaba Khamenei, deklaroi se duhet të merret “hak” për vrasjen e babait të tij, Ajatollah Ali Khamenei, nga Shtetet e Bashkuara dhe Izraeli.

“Hakmarrja është kërkesë e kombit tonë dhe duhet patjetër të realizohet”.  thuhet në një deklaratë të publikuar nga agjencia e lajmeve Fars, e lidhur me shtetin, dhe që i atribuohet atij, shkruan CNN, transmeton Gazeta Express.

“Ne zotohemi se do të marrim hak për gjakun tuaj të pastër dhe për gjakun e të gjithë dëshmorëve të këtyre dy luftërave nga vrasësit kriminalë dhe të turpëruar”, thuhet në deklaratë, drejtuar udhëheqësit të ndjerë.

“Këta kriminelë, emrat e të cilëve njihen dhe janë të dokumentuar nga lart poshtë, do ta marrin me vete në varr dëshirën e tyre për të vdekur të qetë në pleqëri dhe në shtretërit e tyre. Ata duhet ta dinë se kjo çështje nuk varet nga ekzistenca ime apo e zyrtarëve të tjerë”.

Deklarata shton se ky zotim do të përmbushet “së shpejti”, pavarësisht nëse “ne jemi të pranishëm apo jo”.

Ky paralajmërim erdhi vetëm disa orë pasi presidenti amerikan Donald Trump kërcënoi se do ta “shkatërrojë plotësisht” Iranin nëse ai përpiqet ta vrasë.

Së fundmi, operativë të inteligjencës izraelite i kanë njoftuar administratës Trump për kërcënime të dyshuara ndaj presidentit amerikan. Sipas një burimi izraelit dhe një zyrtari amerikan, këto kërcënime pasqyrojnë dëshirën e disa fraksioneve të udhëheqjes së vijës së ashpër në Teheran. Megjithatë, dy burime amerikane të njohura me çështjen thanë se vlerësimet e fundit të inteligjencës amerikane nuk tregojnë ndonjë plan të ri dhe specifik iranian për të vrarë Trumpin, por vetëm një rrjedhë të vazhdueshme bisedash dhe sinjalesh se aktorë të ndryshëm iranianë shprehin dëshirën për ta bërë këtë.

Udhëheqësi i ri suprem ende nuk është shfaqur në publik që nga emërimi i tij.

Besohet se ai u plagos gjatë sulmit të muajit shkurt nga Izraeli dhe SHBA-ja, në të cilin u vranë babai, nëna dhe bashkëshortja e tij. Që nga fillimi i luftës ai ka qëndruar i fshehur, duke komunikuar me mbështetësit vetëm përmes deklaratave me shkrim, pa u shfaqur kurrë personalisht dhe pa përdorur zërin e tij.

Mesazhi i së shtunës është një nga pak deklaratat që janë publikuar që nga emërimi i Khameneit