Gjykata e Apelit ka vërtetuar aktgjykimin e Gjykatës Themelore në Prishtinë, me të cilin Hysri Selimi ishte dënuar me 6 vjet burgim për spiunazh.

“REFUZOHEN si të pabazuara ankesat e Prokurorisë Speciale të Republikës së Kosovës dhe e mbrojtësit të akuzuarit Hysri Selimi, avokat Ali Beka, ndërsa aktgjykimi i Gjykatës Themelore në Prishtinë – Departamenti Special PS.nr.55/2025 i datës 15.06.2026, VËRTETOHET”, thuhet në vendimin e Apelit të përpiluar më 23 tetor 2026.

Ndryshe, Gjykata Themelore në Prishtinë më 15 qershor 2026 ka shpallur aktgjykim dënues ndaj Selimit, duke e dënuar me 6 vjet burgim për spiunazh.

Kundër aktgjykimit të Themelores, ankesë kishte parashtruar Prokuroria Speciale për shkak të shkeljeve esenciale te dispozitave te procedurës penale dhe vendimit mbi sanksionin penal, me propozim që Apeli ta ndryshojë aktgjykimin e ankimuar dhe t’i shqiptojë dënim më të lartë me burgim Selimit.

Kurse, mbrojtësi i të akuzuarit Selimi, avokat Ali Beka parashtroi ankesë për shkak të vërtetimit të gabuar dhe jo të plotë të gjendjes faktike, shkeljeve esenciale të dispozitave të procedurës penale, shkeljes së Ligjit Penal dhe vendimit lidhur me sanksionin penal.

Beka kishte kërkuar që aktgjykimi i shkallës së parë të ndryshohet dhe që i akuzuari të lirohet nga akuza, ose që rasti të kthehet në rigjykim. Po ashtu, avokati kishte parashtruar edhe përgjigje në ankesën e PSRK-së.

Ndërkaq, Prokuroria e Apelit me parashtresë ka propozuar që të aprovohet si e bazuar ankesa e Prokurorisë Speciale, ndërsa ankesa e mbrojtësit të të pandehurit Hysri Selimi, të refuzohet si e pabazuar.

Seanca e kolegjit të Apelit ku u elaboruan ankesat, u mbajt më 7 tetor 2026.