Gjatë ditës së enjte në Kuvendin e Kosovës do të diskutohet për Buxhetin e vitit 2024.

Kështu ka vendosur Kryesia e Kuvendit të Kosovës në mbledhjen e mbajtur të hënën.

Po ashtu, për diskutim dhe votim do të jetë Ligji për Ndarjet Buxhetore për vitin 2024, sipas rekomandimit të Komisionit për Buxhet, Punë dhe Transfere, ku është rekomanduar votimi i Ligjit për buxhetin.

Në fillim të muajit, Qeveria Kurti ka miratuar projekt-buxhetin për vitin 2024.

Projekt-buxheti që kap vlerën 3 miliardë e 314 milionë euro, do t’i dërgohet për votim së shpejti Kuvendit të Kosovës.

Nga ky buxhet, kryeministri Kurti ka njoftuar se kanë ndarë 860 milionë euro për investime kapitale.

Po ashtu, Kurti ka informuar se 742 milionë buxhet do të ndahen për komunat në buxhetin e vitit 2024.

Buxheti i Kosovës në vitin 2023 ka qenë 3 miliardë e 212 milionë euro.