Një operacion i dyshuar sabotazhi në aeroportin e Lajpcigut në Gjermani po hetohet edhe në lidhje me persona të arrestuar në Serbi, ndërsa gjurmët e hetimit çojnë drejt një rrjeti të dyshuar të lidhur me Rusinë, raporton mediumi kroat Index.hr, duke iu referuar të dhënave të publikuara nga revista gjermane “Spiegel”.

Sipas raportimit, hetuesit gjermanë po shqyrtojnë lidhjen mes njërit prej të dyshuarve për sulmin me dron në Lajpcig dhe dy shtetasve të arrestuar në Serbi në qershor për posedim të eksplozivit.

Policia serbe më 11 qershor kishte ndaluar pranë kufirit me Hungarinë dy automjete që po udhëtonin drejt Bashkimit Evropian. Në njërin prej tyre ndodhej Danilo B., shtetas i Serbisë dhe Rusisë, ndërsa në tjetrin shtetasi serb Slobodan D.

Gjatë kontrollit, sipas Index.hr, në njërin automjet u gjetën pjesë të një droni të modifikuar dhe pajisje për kontrollimin e tij. Në automjetin tjetër, në një hapësirë të fshehtë, u gjetën kanaçe të mbushura me eksploziv.

Të dy personat, sipas raportimit, ndodhen në paraburgim që nga qershori. Autoritetet gjermane po verifikojnë nëse ata kanë lidhje të drejtpërdrejtë me personat e dyshuar për operacionin në Lajpcig – një shtetas bjellorus dhe një person me shtetësi të dyfishtë të Rusisë dhe Letonisë, transmeton rtklive.

Eksplozivi dhe metoda e ngjashme

Një nga elementet që ka tërhequr vëmendjen e hetuesve është mënyra e përgatitjes së pajisjes shpërthyese.

Sipas Index.hr, në dronin e përdorur në Lajpcig ishin vendosur rreth 600 gramë eksploziv plastik Semtex, të vendosur në një enë metalike të lidhur me dronin. Një metodë e ngjashme, sipas hetuesve, ishte përdorur edhe në pajisjet e konfiskuara në kufirin serb.

Sulmi në aeroportin e Lajpcigut kishte ndodhur më 4 gusht. Droni, i pajisur me eksploziv, kishte fluturuar drejt avionëve ukrainas të transportit të parkuar dhe kishte goditur krahun e njërit prej tyre. Megjithatë, pajisja nuk kishte shpërthyer për shkak të një defekti në ndezës.

Avioni kishte rezervuarët plot me karburant dhe, sipas raportimit, vetëm një ditë më parë kishte transportuar ndihmë ushtarake dhe municion për Ukrainën.

Hetuesit kanë konstatuar se droni ishte modifikuar për të mundësuar fluturim në distancë më të madhe. Ai kishte bateri shtesë, kamerë, ruter 5G dhe dy karta SIM dhe mund të kontrollohej përmes rrjetit celular.

Në një pemë pranë vendit të ngjarjes ishte gjetur edhe një antenë që dyshohet se shërbente për përforcimin e sinjalit.

Hetimi çon edhe drejt Polonisë

Sipas raportimit të Index.hr, hetimi është zgjeruar edhe për shkak të gjurmëve të ADN-së të gjetura në dron, antenë dhe në enën ku ndodhej eksplozivi.

Njëri prej të dyshuarve dyshohet se është i lidhur edhe me një rast të mëparshëm sabotazhi në qytetin polak Loxh. Atje, në korrik të vitit 2024, ishte shkaktuar zjarr në një dyqan të materialeve të ndërtimit “Leroy Merlin”. Fillimisht ishte menduar se zjarri ishte shkaktuar nga insekticidet, por hetimet e mëvonshme të autoriteteve polake e cilësuan rastin si sabotazh të lidhur me Rusinë.

Po ashtu, hetuesit po verifikojnë nëse në operacionin në Lajpcig kanë marrë pjesë edhe dronë të tjerë. Dyshimet janë shtuar pasi, po atë natë, një avion transportues i DHL-së gjatë uljes kishte goditur një objekt fluturues të paidentifikuar.

Sipas vlerësimeve të disa shërbimeve evropiane të inteligjencës, në territorin e Bashkimit Evropian veprojnë disa rrjete të dyshuara sabotatorësh që lidhen me shërbimet ruse.

Rasti i Lajpcigut ka ngritur shqetësime të reja në Gjermani lidhur me aktivitetet e dyshuara ruse të sabotazhit në Evropë. Autoritetet gjermane kanë akuzuar Moskën për përfshirje në raste të tilla, ndërsa Rusia i ka hedhur poshtë akuzat dhe i ka cilësuar ato si provokime.

Sipas Index.hr, hetimet për rastin vazhdojnë dhe autoritetet gjermane po përpiqen të përcaktojnë shkallën e plotë të rrjetit dhe lidhjet e tij ndërkombëtare.