Sot, më 21 shtator, në mbarë botën shënohet Dita Ndërkombëtare e Paqes, e themeluar nga Kombet e Bashkuara për promovimin e paqes dhe jo-dhunës.

Dita Ndërkombëtare e Paqes u themelua nga Asambleja e Përgjithshme e Kombeve të Bashkuara në vitin 1981, ndërsa për herë të parë u shënua në shtator të vitit 1982.

Në vitin 2001, Asambleja e Përgjithshme caktoi 21 shtatorin si datë të përhershme për shënimin e kësaj dite. Ajo u përcaktua gjithashtu si ditë e armëpushimit global dhe jo-dhunës.

Një nga simbolet më të njohura të kësaj dite është Kambana e Paqes në selinë e Kombeve të Bashkuara në Nju Jork.

Kambana iu dhurua OKB-së në vitin 1954 nga Shoqata e Kombeve të Bashkuara e Japonisë. Ajo është punuar nga monedha dhe medalje të dhuruara nga njerëz dhe përfaqësues të më shumë se 60 vendeve.

Kambana tradicionalisht bie për të shënuar Ditën Ndërkombëtare të Paqes dhe për të përcjellë mesazhin e paqes në mbarë botën.

Tema e Ditës Ndërkombëtare të Paqes për vitin 2026 është “Investimi në paqe: Për të gjithë, kudo, çdo ditë”.

Sekretari i Përgjithshëm i OKB-së, António Guterres, në mesazhin e tij për këtë vit ka bërë thirrje për investim në zhvillim të qëndrueshëm, mbrojtjen e të drejtave të njeriut dhe forcimin e diplomacisë, dialogut dhe negociatave.

Dita Ndërkombëtare e Paqes shënohet çdo vit nga organizata, institucione dhe qytetarë në vende të ndryshme të botës.