9-vjeçari Ohad është në mesin e 13 pengjeve të Hamasit të liruar të premten vonë pasdite, më 24 nëntor, si pjesë e një marrëveshjeje armëpushimi me Izraelin.

Në videon e publikuar shihet 9-vjeçari duke vrapuar në krahët e babait të tij sapo e sheh dhe shpërthen në lot gëzimi. 9-vjeçari u lirua së bashku me nënën e tij 55-vjeçare Keren Mundar dhe gjyshen e tij Ruti, 78 vjeç, ndërsa gjyshi i tij Avraham Mundar mbetet në Gaza.

Ushtria izraelite dha dje më shumë informacion rreth procesit të lirimit të pengjeve të mbajtur në Rripin e Gazës.

Sipas Forcave të Mbrojtjes të Izraelit (IDF), një listë me emrat e atyre që pritet të publikohen do t’i jepet Izraelit çdo ditë.

Ushtria izraelite tha se pengjet do të merren “në zonën kufitare” dhe prej andej do të dërgohen në bazën ajrore Hajerim në Izraelin jugor.

Pasi të lirohen, ata do të priten nga specialistë të shëndetit mendor dhe do t’i nënshtrohen ekzaminimeve fillestare mjekësore, si dhe do t’u jepen numrat e telefonit për të kontaktuar me të afërmit e tyre.

Nga Hajerimi, pengjet e liruar do të dërgohen në spitale, ku do të bashkohen me familjarët e tyre. Gratë e moshuara do të transferohen në një spital të ndryshëm nga fëmijët e vegjël.

Të gjithë pengjet e liruar pritet të qëndrojnë nën vëzhgimin mjekësor për të paktën dy ditë.