Deputeti nga radhët e LDK-së, Besian Mustafa, ka reaguar pasi Gjykata Themelore në Prishtinë e ka dënuar me gjobë prej 200 euro Ministren e Industrisë, Ndërmarrësisë dhe Tregtisë, Rozeta Hajdarin, për aksidentin ku kishte goditur me veturë një fëmijë.

Sipas Mustafës, “shumari n’mal me t’nxan me dru’ të dënon ma shumë”.

“Shumari n’mal me t’nxan me dru’ të dënon ma shumë! Ministrja e shkelë me veturë një vajzë 9 vjeçare, dënohet 200 euro. Kaq ka vlerë për ta një fëmi, 200 euro. E këta të flasin për kapje të shtetit e të gjykatësve. Këta të flasin për korrupsion. Vet janë të korruptuar edhe shpirtërisht! Plagosin fëmijë, e gjykatësit e kapur i dënojnë 200 euro! Dorëheqja e kësaj ministreje nuk mjafton! Jeni mbuluar kokë e këmbë në turp! Të paftyrë!”, ka shkruar Mustafa.