Argjentina do të përpiqet të mbrojë titullin e kampionit të botës të dielën, kur do të përballet me kampionen e vitit 2010, Spanjën, në një finale shumë të pritur që do të zhvillohet në stadiumin “MetLife” në East Rutherford, New Jersey.

Skuadra e Lionel Scalonit është vetëm një fitore larg faktit që të bëhet kombëtarja e parë që fiton dy Kupa Bote radhazi që nga Brazili në vitet 1958 dhe 1962, pasi golat e vonshëm të Enzo Fernandez dhe Lautaro Martinez ndaj Anglisë i siguruan kualifikimin në finale.

Nga ana tjetër, kampionia e Evropës, Spanja, hyn në këtë finale me vetëbesim të madh pas fitores bindëse 2-0 ndaj Francës në gjysmëfinale.

Çuditërisht, kjo është vetëm ndeshja e dytë zyrtare mes Spanjës dhe Argjentinës.

Takimi i parë u zhvillua në vitin 1966, kur Argjentina fitoi 2-1 falë dy golave të sulmuesit Luis Artime.

Në total, të dy kombëtaret kanë zhvilluar edhe 13 ndeshje miqësore ndër vite.

Përballja e fundit mes tyre ishte në vitin 2018, kur Spanja e mposhti Argjentinën me rezultatin e thellë 6-1.

Këtë herë, një nga temat më të mëdha të finales do të jetë përballja e parë mes Lionel Messit dhe Lamine Yamal.

Rrugëtimi i Argjentinës drejt finales së Kupës së Botës 2026

Grupi J – Argjentina 3-0 Algjeria
Grupi J – Argjentina 2-0 Austria
Grupi J – Jordania 1-3 Argjentina
1/16 e finales – Argjentina 3-2 Kepi i Gjelbër
1/8 e finales – Argjentina 3-2 Egjipti
Çerekfinalja – Argjentina 3-1 Zvicra
Gjysmëfinalja – Anglia 1-2 Argjentina

Rrugëtimi i Spanjës drejt finales së Kupës së Botës 2026

Grupi J – Spanja 0-0 Kepi i Gjelbër
Grupi J – Spanja 4-0 Arabia Saudite
Grupi J – Uruguai 0-1 Spanja
1/16 e finales – Spanja 3-0 Austria
1/8 e finales – Portugalia 0-1 Spanja
Çerekfinalja – Spanja 2-1 Belgjika
Gjysmëfinalja – Franca 0-2 Spanja

Kur nis finalja e Kupës së Botës?

Finalja mes Spanjës dhe Argjentinës, zhvillohet të dielën (19 korrik), me fillim nga ora 21:00.

Duke marrë frymëzim nga spektakli i famshëm i Super Bowl-it, ku së fundmi performuan Bad Bunny dhe Lady Gaga, FIFA ka vendosur ta sjellë këtë traditë amerikane edhe në Kupën e Botës të këtij viti.

Pëlqehet apo jo, spektakli madhështor ishte gjithmonë i destinuar të ishte pjesë e finales në New York.

Këngëtari kanadez Justin Bieber do të jetë artisti kryesor në një shfaqje 11-minutëshe, së bashku me Madonna, grupin korean BTS, Gustavo Dudamel dhe Shakirën, interpreten e këngës zyrtare të Kupës së Botës, “Dai Dai”.

FIFA ende nuk ka konfirmuar kohën e saktë të fillimit të spektaklit, por “The Athletic”, duke iu referuar disa burimeve, raporton se synimi është që pushimi mes dy pjesëve të zgjasë rreth 20 minuta.

Ndërkohë, “The Times” shkruan se ai mund të zgjasë deri në 30 minuta.

Si pasojë, FIFA pritet të devijojë nga një rregull i kahershëm i futbollit, sipas të cilit pushimi mes pjesëve zgjat 15 minuta.

Sipas rregullores së IFAB-it (Bordi Ndërkombëtar i Shoqatës së Futbollit), pushimi “mund të ndryshohet vetëm me lejen e arbitrit”.

Megjithëse performanca artistike do të zgjasë vetëm 11 minuta, nevojitet kohë shtesë për vendosjen dhe largimin e skenës në fushë, ku do të performojnë artistët.