Të paktën tetë persona, përfshirë dy fëmijë, humbën jetën si pasojë e një vale sulmesh me raketa dhe dronë të ndërmarra nga Rusia ndaj Ukrainës.

Presidenti ukrainas, Volodymyr Zelensky, paralajmëroi të mërkurën se Rusia po përgatitej për një “sulm masiv”, duke u bërë thirrje qytetarëve të respektonin alarmet ajrore dhe të strehoheshin në kohë.

Gjatë orëve të para të së enjtes, ushtria ukrainase raportoi për sulme të shumta me raketa dhe dronë në disa rajone të vendit.

Sulmet ndodhën vetëm pak ditë pasi Zelensky u takua në Uashington me presidentin amerikan Donald Trump, ku kërkoi që SHBA t’i japë Ukrainës licencë për prodhimin e raketave interceptuese Patriot.

Në një fshat pranë qytetit Kryvyi Rih, një raketë balistike goditi një banesë private, duke vrarë gjashtë persona, mes tyre dy vajza të moshës 5 dhe 12 vjeç. Tetë persona të tjerë mbetën të plagosur, përfshirë dy fëmijë, ndërsa autoritetet paralajmëruan se numri i viktimave mund të rritet.

Në kryeqytetin Kiev, një person humbi jetën dhe zjarre shpërthyen në tre ndërtesa të pabanuara, sipas kryebashkiakut Vitali Klitschko.

Ndërkohë, kryetari i bashkisë së Poltavës raportoi gjithashtu për një viktimë, pasi një terminal i kompanisë postare Nova Poshta u godit gjatë sulmeve.