Aftësitë e Rusisë në Veri janë një sfidë strategjike për NATO-n, tha të premten Sekretari i Përgjithshëm i saj, Jens Stoltenberg, duke përshëndetur investimet e shpallura së fundmi të Kanadasë në sistemet e mbrojtjes të Amerikës së Veriut pas vizitës së tij të parë në Arktikun kanadez, shkruan Reuters, transmeton Gazeta10.

“Rëndësia e veriut të lartë po rritet për NATO-n dhe Kanadanë, sepse ne shohim një ngritje të konsiderueshme ushtarake ruse,” tha Stoltenberg, duke qëndruar përkrah kryeministrit kanadez Justin Trudeau në Cold Lake, Alberta.

Rusia ka rihapur qindra objekte ushtarake të epokës sovjetike në Arktik, duke përdorur rajonin për të testuar sisteme të reja armësh, tha Stoltenberg. Ai paralajmëroi gjithashtu se Rusia dhe Kina po formonin një partneritet strategjik arktik që sfidonte vlerat dhe interesat e NATO-s.

“Situata gjeopolitike ka ndryshuar gjatë muajve të fundit, prandaj të kuptuarit se Rusia është një shqetësim në rritje për të gjithë ne, e bën me kohë që ne të ndajmë me Sekretarin e Përgjithshëm dhe me NATO-n të gjitha gjërat që Kanadaja po bën përmes NORAD.” tha Trudeau.

Trudeau dhe Stoltenberg vizituan Gjirin e Kembrixhit, Nunavut, të enjten, një fshat mbi Rrethin Arktik ku ndodhet një post radar për mbrojtjen ajrore. Ai është pjesë e Sistemit të Paralajmërimit Verior të NORAD, për të cilin ekspertët thonë se ka nevojë urgjente për përmirësime. / Gazeta10